Բժշկական տեքստերի հետ աշխատանքի 20 տարվա փորձն ինձ ուղղակի ստիպեց անտարբեր չանցնել ու նշել սոցցանցերում ու կայքերում շատ հաճախ հանդիպող այս տերմինների ճիշտ գրությունը՝ կարճ բացատրություններով:
Հուսամ՝ չեմ ալարի ու ժամանակի ընթացքում կլրացնեմ ցանկը:
❌ կապա ✅ կապպա
Կապա-ն հայերենում արդեն գոյություն ունեցող բառ է (թեև այսօր արդեն գրեթե չի գործածվում, երևի միայն գեղարվեստական գրքերում հանդիպի), նշանակում է կնոջ կամ տղամարդու երկար զգեստ, վերարկու:
Կապպա-ն (որը կապա են գրում սխալմամբ) ստոմատոլոգիական ոլորտին է պատկանում՝ ատամնաշարի շտկման համար գործածվող օրթոդոնտիկ հարմարանք է։
❌ կլման ակտ ✅կլլման ակտ (կլլել՝ կուլ տալ կամ կլանել բառից)
Հաճախ բառարմատին անծանոթ լինելով՝ գրում են 1 լով, սակայն բառի արմատը կլլելն է՝ կուլ տալը, հետևաբար՝ կլլման ակտ:
❌հիպոքսիա ✅ հիպօքսիա
Այստեղ գործ ունենք օքսիա (հունարեն oxys՝ թթու, թթվածին) արմատի հետ, հետևաբար բառամիջում պետք է գրվի կլոր օ 😉 : Նույն կերպ են գրվում նաև այդ արմատից կազմված այլ բառերը՝ հակաօքսիդանտ, հիդրօքսիդ ևն:
❌ պարոդոնտիտ ✅պարօդոնտիտ
Այստեղ նույնպես գործ ունենք օ-ով սկսվող՝ օդոնտոս արմատի հետ, հունարեն odontos-ատամ բառից, հետևաբար բառամիջում գրում ենք նույն՝ դեռ դպրոցից ծանոթ կլոր օ-ն: Նույն կերպ են գրվում նաև odontos արմատով կազմված այլ բառերը՝ պարօդոնտոզ, պարօդոնտիտ:
Նշում. օդոնտոս-ի դեպքում օրթոդոնտիան էլ պետք է օրթոօդոնտիա գրվի, բայց, չգիտես ինչու, նույնիսկ դասագրքերում բառամիջում «ո» է, ու չեմ համարձակվում պնդումներ անել 😐
