Եթե երբևէ վարել եք բիզնես էջեր սոցցանցերում, ապա հաստատ հանդիպած կլինեք այնպիսի խնդրի, ինչպիսին է հետևորդների, այն է՝ պոտենցիալ հաճախորդների հետ շփման բարդությունը:
Խնդիր առաջանում է հատկապես այն դեպքում, երբ հաճախորդը «նյարդայնացնում է»՝ տալով ավելորդ կամ անիմաստ հարցեր, կամ էլ ընդհակառակը՝ որևէ հարցի փոխարեն + դնում 🙂
Մենք նյարդայնանում ենք, բողոքում, բայց չենք փորձում ելք գտնել: Այնինչ փոխարենը կարելի է փորձել «կրթել» հաճախորդին՝ ասեմ ինչպես:
Ինչպե՞ս շփվել «+» դնող հետևորդների հետ
Շատ էջեր իրենց գրառումներում հետևորդերին առաջարկում են դնել «+» կամ որևէ այլ նշան՝ փոխարենն ինչ-որ բան առաջարկելով (տվյալների տրամադրում և այլն): Երևի թե հենց այս միտումն էլ դարձել է «+» դնելու մոդայի հիմքը: Ինչպես ասում են՝ աչքը դուրս գա, անունը դուրս չգա: Պլյուս դնելու առաջարկները պակասեցին, բայց մոդան չանցավ, և բոլոր գրառումների տակ անխտիր դրվող անիմաստ պլյուսներն արդեն հոգնեցնում են…
Արդարացի լինելու համար ասեմ, որ այդ հարցում մեղավոր են նաև մեկնաբանություններին պատասխանողները. երբ ամեն մի «+» նշանի դեպքում դուք շտապում եք տրամադրել ինֆորմացիա, արդեն իսկ սովորեցնում եք, որ այդպես էլ պետք է լինի:
«+» դնող հաճախորդներին կարելի է պատասխանել այսպես. «Բարև Ձեզ, ինչո՞վ կարող ենք օգնել»:
Այս դեպքում արդեն նա ինքը պետք է ստիպված լինի չալարել ու գրել, թե ինչ է ուզում կոնկրետ: Մի քանի այսպիսի դեպքի հանդիպելուց հետո հավանական է, որ նա կա՛մ փոխի մոտեցումը և ձևակերպի հարցը, կա՛մ պարզապես թողնի անիմաստ պլյուս դնելու սովորությունը:
Ինչպե՞ս պատասխանել «gine kasek?» հարցնողներին, երբ գինը նշված է
Եվս մեկ նյարդայնացնող դեպք: Նեղսրտում ենք, բողոքում հետևորդների անուշադրությունից ու նման հարցերին պատասխանելու համար վատնած ժամանակից: Մեծ մասամբ պատասխանը լինում է երկու տեսակի՝ կա՛մ «մուննաթ գալ», որ գինը նշված է, կամ էլ սուսուփուս ևս մեկ անգամ գրել հրապարակման մեջ նշված գինը, հասցեն կամ մեկ այլ տվյալ:
Որքան էլ պարզունակ թվա, բայց կարելի է փորձել «կրթել» նաև այս դեպքում՝ համատեղելով վերը նշված երկու տարբերակները:
«Բարև Ձեզ, ապրանքը (ծառայությունը) արժե x դրամ, ինչպես նշված է հրապարակման մեջ»:
«Բարև Ձեզ, մեր հասցեն է այսինչ-այսինչ, ինչպես նշված է հրապարակման մեջ»:
Այս դեպքում մենք մի կողմից՝ չենք զլանում և պատասխանում ենք հարցին, մյուս կողմից՝ ակնարկում ենք, որ հրապարակման մեջ նշված էր տվյալը, և կարելի է ավելի ուշադիր լինել:
Չի բացառվում, որ նման մի քանի դեպքից հետո օգտատերերը հասկանան, որ կարելի է ավելի ուշադիր լինել և ուսումնասիրել՝ նախքան հարցեր տալը:
Վերջում ավելացնեմ, որ անիմաստ հարցերից նյարդայնանալուց առաջ պետք է համոզված լինել, որ գրառման մեջ ամեն ինչ հստակ է ձևակերպված, չկան անորոշ, անհասկանալի կամ երկիմաստ մտքեր:
